Ralf Rangnick nýr stjóri Manchester United bíður eftir atvinnuleyfi til að geta tekið til hendinni hjá félaginu sem hefur átt í vandræðum síðustu vikur.
Rangnick er þekktari fyrir það að byggja upp smærri félög og gera þau stór, það gerði hann bæði hjá Hoffenheim og RB Leipzig í Þýskalandi.
Þessi 62 ára gamli þýski stjóri mun líklega stýra United í fyrsta sinn um næstu helgi þegar liðið mætir Crystsal Palace. Flóknara ferli í kringum atvinnuleyfi tefur komu hans til félagsins.
Rangnick var stjóri Hoffenheim frá 2006 til 2011 en sumarið 2010 lagði hann mikla áherslu á að félagið myndi kaupa Gylfa Þór Sigurðsson frá Reading.
Að lokum tókst Hoffenheim að kaupa Gylfa frá enska félaginu og borgaði Hoffenheim 6,5 milljónir punda fyrir Gylfa. Gylfi varð þá dýrasti leikmaður sem Reading hafði selt. Lék Gylfi í eitt ár undir stjórn Rangnick og spilaði vel.
Ólíklegt er að Rangnick mæti Gylfa í enska boltanum í vetur en Gylfi er áfram undir rannsókn lögreglu Í Bretlandi. Er íslenski miðjumaðurinn laus gegn tryggingu fram í miðjan janúar.
