Arnar Þór Viðarsson landsliðsþjálfari Íslands liggur undir feld og skoðar hvaða skref hann ætlar að taka þegar kemur að aðstoðarmanni sínum. Eiður Smári Guðjohnsen lét af störfum í síðutsu viku.

Ljóst er að Arnar þarf að vanda val sitt vel og í Fréttablaðinu í dag er lagt til að Arnar reyni að sannfæra Heimi Hallgrímsson um að þjálfa liðið með sér.

Heimir lét af störfum hjá KSÍ árið 2018 en hann hefur mikla reynslu og þekkingu þegar kemur að því að byggja upp landslið sem nær árangri.

„Þannig vill svo til að besti þjálfari í sögu íslenska landsliðsins er án vinnu, Heimir Hallgrímsson hefur ekki verið með þjálfarastarf síðasta hálfa árið. Eftir tvö og hálft ár í Katar ákvað Heimir að kveðja Al-Arabi og hefur síðan þá leitað sér að næsta starfi,“ skrifar Hörður Snævar Jónsson fréttastjóri íþróttadeildar Torgs í Fréttablaðinu í dag.

Leggur Hörður til að Arnar kyngi örlitlu stolti og fái Heimi til að þjálfa liðið með sér. „Knattspyrnusamband Íslands og Arnar Þór ættu án nokkurs vafa að leita til Heimis og reyna að fá hann til að þjálfa liðið með Arnari. Heimir þekkir það manna best að tveggja manna þjálfarateymi getur virkað með íslenska landsliðið. Heimir og Lars Lagerbäck þjálfuðu liðið saman þegar það komst inn á Evrópumótið árið 2016. Heimir tók síðan einn við keflinu í tvö ár og kom íslenska liðinu á Heimsmeistaramótið árið 2018.“

Utan vallar pistilinn heldur svo áfram og segir. „Arnar gat ekki unnið með Lars Lagerbäck á þessu ári og var ákveðið að slíta samstarfinu, hann þarf hins vegar að átta sig á því að maður með reynslu gæti reynst honum happafengur nú þegar Eiður Smári er horfinn á braut.“