Lið Belenenses gaf leik sinn gegn Benfica í efstu deildinni í Portúgal í gær í hálfleik. Liðið var ansi undirmannað vegna kórónuveirusmita í herbúðum þess.

Vegna hópsmits í herbúðum Belenenses voru aðeins níu leikmenn liðsins liðtækir í gær. Liðið lék því með tveimur mönnum færra en Benfica.

Sjá einnig: Ástand í Portúgal – Náðu ekki í fullt lið vegna smita en þurftu samt að mæta til leiks

Ekki nóg með það heldur voru tveir leikmannanna markverðir. Annar þeirra þurfti að spila sem útileikmaður.

Þrátt fyrir allt þetta var leiknum ekki frestað. Fyrir það hefur portúgalska knattspyrnusambandið verið gagnrýnt af mörgum.

Staðan í hálfleik var 0-7 fyrir Benfica. Aðeins sjö leikmenn Belenenses mættu til leiks í seinni hálfleik. Það er lágmarksfjöldi sem þarf að hafa til að mega spila leik.

Þegar einn leikmaður Belenenses sagðist ekki geta haldið áfram vegna meiðsla þurfti svo að flauta leikinn af.