Staða Kylian Mbappe hjá Paris Saint-Germain er sú nákvæmlega sama og í ágúst. Þessi 22 ára gamli sóknarmaður er ekkert nær því að skrifa undir nýjan samning við franska stórveldið. Samningur hans rennur út í sumar. AS á Spáni segir frá þessu.
Tíminn er ekki að vinna með PSG en það stefnir í að félagið missi stjörnu sína frítt næsta sumar. Real Madrid hefur mikinn áhuga á leikmanninum.
Spænska félagið bauð 189 milljónir punda í Mbappe síðasta sumar. Parísarfélagið hafnaði tilboðinu þá þrátt fyrir samningsstöðu Frakkans. Leikmaðurinn vildi sjálfur fara í sumar, bæði sín vegna og félagsins, sem hefði fengið háa upphæð fyrir hann.
PSG hefur alltaf verið vongott um að Mbappe skrifi undir. Hann gæti orðið sá launahæsti hjá félaginu. Það skiptir hann þó ekki máli. Hann vill komast til Real Madrid.
Þrátt fyrir að vera ekki tilbúinn til þess að fara í samningsviðræður við PSG þá er samband hans við félagið sagt gott. Hann vill gera allt í sínu valdi til þess að vinna Meistaradeild Evrópu með félaginu í vor.