Arsenal vann nokkuð þægilegan sigur á Newcastle í fyrsta leik helgarinnar í ensku úrvalsdeildinni. Leikið var á Emirates-vellinum.
Heimamenn stýrðu ferðinni í fyrri hálfleik. Pierre Emerick Aubameyang fékk langbesta tækifærið til að koma þeim yfir seint í hálfleiknum. Hann setti boltann hins vegar í stöngina á ótrúlegan hátt þegar það virtist afar einfalt að skora.
Skömmu áður hafði Jojo Shelvey þó verið nálægt því að koma Newcastle yfir. Aaron Ramsdale varði skot hans hins vegar frábærlega. Markalaust var í hálfleik.
Arsenal var miklu betri aðilinn í seinni hálfleik og komst yfir á 56. mínútu. Þá skoraði Bukayo Saka eftir góða sókn.
Tíu mínútum síðar tvöfaldaði Gabriel Martinelli svo forystu Arsenal með frábærri afgreiðslu eftir flotta sendingu frá Takehiro Tomiyasu. Martinelli var nýkominn inn á sem varamaður.
Newcastle ógnaði lítið í seinni hálfleik og var sigur Arsenal ekki í hættu. Lokatölur 2-0. Arsenal er í fimmta sæti deildarinnar með 23 stig. Newcastle er á botninum með 6 stig.