Rio Ferdinand telur að Jurgen Klopp ætti að gera allt í sínu valdi til þess að reyna að sannfæra Erling Haaland að ganga til liðs við Liverpool.
Mörg lið hafa áhuga á Haaland sem slegið hefur í gegn hjá Dortmund síðustu tímabil. Manchester City er talinn líklegur áfangastaður hans næsta sumar en Ferdinand telur að Liverpool ætti að reyna að næla í kappann.
„Mér finnst hann frekar henta öðrum liðum en Manchester City. Ef ég réði hjá Liverpool myndi ég reyna að klófesta hann strax,“ sagði Ferdinand á BT Sport.
„Ef hann færi til Liverpool væri framlínan þeirra ósigranleg. Ég held að hann ætti auðveldara með að aðlagast þar en hjá Manchester City.“
„Þetta sést til dæmis með Jack Grealish. Hann er frábær leikmaður en hann hefur átt erfitt með að aðlagast og komast í liðið.“