Víðir Sigurðsson blaðamaður á Morgunblaðinu er á þeirri skoðun að KSÍ eigi að taka áfengi af innkaupalista sínum. Skrifar Víðir pistil í blað dagsins í kjölfarið að því að Eiður Smári Guðjohnsen lét af störfum sem aðstoðarþjálfari karlalandsliðsins.
Fjallað var um málefni landsliðsins í gær eftir að Eiður lét af störfum. „Eftir að KSÍ upplýsti laust fyrir miðnættið í fyrrakvöld að Eiði Smára Guðjohnsen hefði verið sagt upp störfum sem aðstoðarþjálfara fór af stað umræða um veitingar áfengis að loknum landsliðsverkefnum,“ skrifar Víðir sem hefur ýmsa fjöruna sopið í heimi blaðamennsku.
Hann ræðir einnig atvik þegar Jón Þór Hauksson lét af störfum sem þjálfari kvennalandsliðsins fyrir rúmum ellefu mánuðum. „KSÍ brenndi sig á slíku hjá kvennalandsliðinu fyrir ári, þegar þáverandi þjálfari þess fór yfir strikið og þurfti í kjölfarið að segja af sér.“
„Hvort sem þessi uppsögn tengist beint áfengisveitingum eftir síðasta landsliðsverkefni eða ekki hlýtur að vera komið að því að sambandið striki yfir allt slíkt á sínum vegum.“
Víðir segir að landsliðsfólk geti tekið ákvörðun um að kaupa sér áfengi en að sambandið sjálft eigi ekki að bjóða upp á slíkt.
„Landsliðsfólk getur að sjálfsögðu fagnað lokum verkefna eins og því hentar. Alla vega þegar það er yfir lögaldri. En rétt eins og félagið mitt fyrir austan ætti KSÍ að geta sett strangar reglur og sýnt fordæmi með því að taka áfengið af sínum innkaupalista.“