Áritun Mauricio Pochettino á treyju Manchester United hefur vakið gríðarlega athygli enda er hann sterklega orðaður við starfið.
Pochettino var staddur í Manchester í gær þegar PSG tapaði á útivelli gegn Manchester City. PSG hefur hafnað fyrstu beiðni United um að fá Pochettino.
Michael Carrick stýrði Manchester United í fyrradag er liðið vann góðan 2-0 útisigur á spænska liðinu Villarreal í Meistaradeild Evrópu og tryggði sér um leið sæti í 16-liða úrslitum keppninnar.
Í yfirlýsingu um starfslok Solskjærs á dögunum lögðu forráðamenn Manchester United fram áætlun sína. Félagið hyggst ráða bráðabirgðastjóra út tímabilið og gengið verður frá ráðningu á framtíðar knattspyrnustjóra liðsins fyrir næsta tímabil.
Talið er að United reyni aftur við Pochettino áður en félagið fer að horfa í tímabundna kosti.