Vanda Sigurgeirsdóttir formaður KSÍ hefur ekki svarað fyrir málefni Eiðs Smára Guðjohnsen það sem af er degi. DV hefur frá því á mánudag reynt að fá Vöndu til að ræða málið enda var byrjað að kvisast út að sambandið ætlaði að nýta sér uppsagnarákvæði í samningi Eiðs Smára.
Elvar Geir Magnússon er einn þeirra sem gagnrýnir Vöndu harkalega. „Sýnist fótboltahreyfingin þurfa að fara fram á að sett verði inn í starfslýsingu hálaunaðs formanns að hann þurfi að svara en fari ekki í felur þegar upp koma vandamál,“ skrifar Elvar Geir.
KSÍ tilkynnti seint í gærkvöldi að samkomulag hefði náðst við Eiðs Smára um starfslok. Tengist það atviki sem kom upp í Norður-Makedóníu.
Þannig segir í frétt Fótbolta.net „Samkvæmt heimildum Fótbolta.net var Eiður enn í annarlegu ástandi þegar hópurinn hittist í morgunmat á mánudagsmorgun. Eiður var á gulu spjaldi eftir að myndband af honum komst í dreifingu þar sem hann var ölvaður að kasta af sér vatni á Ingólfstorgi.“
Sýnist fótboltahreyfingin þurfa að fara fram á að sett verði inn í starfslýsingu hálaunaðs formanns að hann þurfi að svara en fari ekki í felur þegar upp koma vandamál. #fotboltinet
— Elvar Geir Magnússon (@elvargeir) November 24, 2021
