Sex leikjum er nýlokið í riðlakeppni Meistaradeildar Evrópu.
Barcelona 0-0 Benfica
Barcelona og Benfica gerðu markalaust jafntefli á Nývangi.
Úrslitin þýða að Barcelona er í öðru sæti riðilsins fyrir lokaumferðina með 7 stig, 8 stigum á eftir toppliði Bayern Munchen. Benfica er í þriðja sæti með 5 stig. Dynamo Kyiv er svo á botni riðilsins með 1 stig.
Barcelona mætir Bayern Munchen á útivelli í næstu umferð og á því í töluverðri hættu á að falla úr leik. Benfica vann fyrri leik sinn gegn Barcelona svo sigur gegn Dynamo myndi duga þeim áfram á meðan Barca vinnur ekki gegn Bayern.
Young Boys 3-3 Atalanta
Young Boys og Atalanta gerðu dramatíkst 3-3 jafntefli í Sviss.
Duvan Zapata kom gestunum yfir á 10. mínútu en Jordan Siebatcheu jafnaði fyrir Young Boys um fimm mínútum fyrir leikhlé.
Snemma í seinni hálfleik kom Jose Luis Palomino Atalanta aftur yfir. Á 80. mínútu jafnaði Vincent Sierro fyrir heimamenn og stuttu síðar voru þeir komnir yfir með marki Silvan Hefti. Luis Muriel bjargaði þó stigi fyrir Atalanta á 88. mínútu.
Manchester United er á toppi riðilsins með 10 stig og er komið áfram fyrir lokaumferðina. Villarreal er í öðru sæti með 7 stig, Atalanta með 6 stig og Young Boys með 4 stig.
Sevilla 2-0 Wolfsburg
Sevilla vann 2-0 sigur á Wolfsburg með mörkum frá Joan Jordan á 13. mínútu og Rafa Mir í uppbótartíma.
Lille 1-0 Salzburg
Lille vann Salzburg á heimavelli. Eina mark leiksins skoraði hinn funheiti Jonathan David eftir rúman hálftíma leik.
Lille er á toppi riðilsins með 8 stig, Salzburg er í öðru sæti með 7 stig, Sevilla í þriðja sæti með 6 og Wolfsburg í fjórða sæti með 5.
Chelsea 4-0 Juventus
Chelsea valtaði yfir Juventus, 4-0. Trevoh Chalobah gerði eina mark fyrri hálfleiks á 25. mínútu. Reece James bætti við marki með frábæru skoti á 56. mínútu. Stuttu síðar var Callum Hudson-Odoi búinn að gera út um leikinn fyrr Chelsea. Timo Werner bætti fjórða markinu svo við í blálokin.
Malmö 1-1 Zenit
Malmö var óheppið með að ná ekki í sigur gegn Zenit. Svíarnir komust yfir á 28. mínútu með marki Soren Rieks. Í uppbótartíma jafnaði Yaroslav Rakitsky hins vegar muninn fyrir Zenit.
Chelsea er á toppi riðilsins með 12 stig, eins og Juventus. Zenit er í fjórða sæti með 4 stig og Malmö á botninum með 1 stig.