Steven Gerrard, knattspyrnustjóri enska úrvalsdeildarliðsins Aston Villa, fékk draumabyrjun með liði sínu um síðustu helgi er liðið vann sigur á Brighton í ensku úrvalsdeildinni. Fyrir leikinn hafði Aston Villa tapað fimm leikjum í röð og því er sigurinn kærkominn.
Það er ekki langt síðan að Gerrard tók við sem knattspyrnustjóri hjá félaginu en hann er strax farin að herða tökin, beita valdi sínu og koma á aga.
Knattspyrnustjórinn ungi hefur til að mynda, samkvæmt heimildum The Sun, bannað leikmönnum að fá sér gosdrykki, tómatsósu, búðing og heitt súkkulaði á æfingasvæðinu, eitthvað sem hefur staðið til boða hjá fyrirrennara hans hjá félaginu.
Þessi stefnubreyting hjá Aston Villa minnir mikið á ákvarðanir sem Antonio Conte, knattspyrnustjóri Tottenham tók þegar að hann tók við stjórn félagsins á dögunum. Conte ákvað að banna notkun tómatsósu og majóness á æfingasvæðinu.
Aston Villa situr í 15 .sæti ensku úrvalsdeildarinnar um þessar mundir með 13 stig. Næsti leikur liðsins er á laugardaginn næstkomandi er liðið heimsækir Crystal Palace á Selhurst Park í Lundúnum.
Gerrard tók við Aston Villa fyrr í mánuðinum og kom þar inn í staðinn fyrir Dean Smith sem hafði verið rekinn. Gerrard hefur undanfarin ár stýrt skoska liðinu Rangers við góðan orðstír og tókst meðal annars að gera liðið að skoskum meisturum á síðasta tímabili er liðið komst taplaust í gegnum tímabilið.