Fjöldi íslenskra knattspyrnumanna hefur á síðustu árum farið til Ítalíu. Íslendingaæði hefur verið hjá ítölskum félögum og var það til umræðu hjá Dr. Football í gær.
Hjörvar Hafliðason sem er einn helsti sérfræðingur þjóðarinnar í knattspyrnu efast um hvort ítalska leiðin sé að virka fyrir Íslendinga.
„Ég ætla að leyfa mér að kalla þetta ítölsku leiðina, það eru mjög margir íslenskir fótboltamenn farnir að fara til Ítalíu. Getið þið nefnt mér dæmi þar sem ítalska leiðin hefur virkað? Ég er ekki að tala um Emil Hallfreðsson eða Birki Bjarnason,“ sagði Hjörvar í vinsælum þætti sínum í gær.
Andri Fannar Baldursson sem er í eigu Bologna var til umræðu en hann fór til félagsins árið 2019. Hann var svo lánaður til FCK í Danmörku í sumar.
„Ég er að tala um þessa nýju sprengju eftir að Andri Fannar fór til Bologna, fjórir Íslendingar hjá Bologna. Það eru nokkrir hjá Venezia og Lecce. Það er enginn að spila eða gera neitt.“
„Ég hef ekki séð hvort þeir hafa bætt sig, Andri Fannar fór ungur út og hefur alveg bætt sig. Það má setja það í efa að það hafi virkað fyrir hann,“ sagði Hjörvar.
Jóhann Már Helgason segir það vonbrigði hvernig Íslendingum gengur á Ítalíu. „Andri fékk skrefið til FCK, af þessum leikmönnum sem fóru þangað núna. Óttar Magnnús, Brynjar Ingi og Arnór Sig. Enginn af þeim hefur gert neitt, Óttar Magnús fór í þriðju deild. Enginn með alvöru mínútur í efstu deild.“
Einnig er mikið af ungum Íslendingum hjá ítölskum félögum en lítið heyrist. „Maður heyrir ekkert af þessum gaurum, getur verið að þetta ítalsk æði virki ekki.“