Tveir af dáðustu framherjum í sögu Íslands eru orðaðir við Íslands og bikarmeistara Víkings í knattspyrnu. Kom það fram í hlaðvarpsþættinum Dr. Football að Kolbeinn Sigþórsson og Jón Daði Böðvarsson væru á óskalista liðsins.
Samningur Kolbeins við IFK Gautaborg er á enda í lok árs og er óvíst hvaða skref Kolbeinn tekur á ferli sínum. Hann hefur ekki komið við sögu hjá IFK Gautaborg síðustu mánuði eftir að hafa gengist undir aðgerð.
Jón Daði Böðvarsson hefur ekki spilað fótbolta um langt skeið, fær hann enginn tækifæri hjá Milwall á Englandi.
„Ég sel þetta ekki dýrara en ég keypti þetta, Kolbeinn Sigþórsson og Jón Daði Böðvarsson hafa áhuga á að taka slaginn í Meistaradeildinni með Víkingum,“ sagði Hjörvar Hafliðason í hlaðvarpsþætti sínum í gær.
Jóhann Már Helgason sló þá á létta strengi og sagði. „Er Lars Lagerback að koma í teymið líka,“ sagði Jóhann en Kolbeinn og Jón Daði byrjuðu alla leiki Íslands á Evrópumótinu í Frakklandi undir stjórn Lagerback og Heimis Hallgrímssonar.
„Maður er alltaf að vona að Kolbeinn eigi eitthvað inni í sér, ég ætla að taka þessu með fyrirvara til að byrja með,“ sagði Jóhann.
Albert Brynjar Ingason telur ekki ólíklegt að Kolbeinn taki einn snúning með uppeldisfélagi sínu. „Maður hugsar að Jón Daði eigi eitthvað inni, Kolii er hugsanlega að hætta. Þetta er kannski næsta lending að taka smá hérna,“ sagði Albert.
Kolbeinn er markahæsti leikmaður í sögu landsliðsins ásamt Eiði Smára Guðjohnsen en Jón Daði Böðvarsson átti mörg frábær ár með liðinu.
