Tómas Þór Þórðarson stjórnandi útvarpsþáttarins Fótbolta.net á X977 telur að Hannes Þór Halldórsson fari í KR eða hætti í fótbolta.
Hannes samdi um starfslok við Val í síðustu viku en Tómas segir ljóst að stjórnarmenn á Hlíðarenda hafi þurft að millifæra nokkrar milljónir inn á Hannes.
Valur hafði fengið Guy Smith til félagsins og því var framtíð Hannesar í óvissu, pillur gengu manna á milli í fjölmiðlum og að lokum var samið um starfslok.
„Það er ljóst að miðað við það sem maður hefur heyrt hvað Hannes var með í laun – sem var jafnmikið og hann átti skilið fyrir það sem hann hefur gert á sínum ferli og líka fyrir Val – að þetta hefur verið fjandi góð summa út í buskann fyrir Val. Þeir eru að borga honum einhverjar milljónir fyrir að gera ekkert,“ sagði Tómas Þór Þórðarson í útvarpsþættinum Fótbolta.net.
Talað hefur verið um að Hannes hafi verið 1,4 milljón á mánuði hjá Val en hann átti ár eftir af samningi sínum á Hlíðarenda.
Hannes kvaðst í síðustu viku meðvitaður um áhuga Leiknis sem er hann uppeldisfélag, Tómas telur ansi litlar líkur á því að Hannes fari þangað og segir. „Já, en mjög litlar líkur á því. Ég held að hann hætti eða fari í KR,“ svaraði Tómas.