Natasha Moraa Anasi er í landsliðshópi Íslands sem mætir Kýpur í undankeppni HM í þessum mánuði. Natasha gekk í raðir Breiðabliks frá Keflavík á dögunum.
Natasha, sem er þrítug, kom til Breiðabliks frá Keflavík þar sem hún hefur verið fyrirliði síðustu ár. Hún kom fyrst til landsins til að spila með ÍBV árið 2014 og hefur verið hér síðan og fest rætur.
Natasha fékk íslenskan ríkisborgararétt fyrir tveimur árum og hefur þegar spilað tvo A-landsleiki fyrir Íslands hönd. Komu þeir landsleikir á síðasta ári þegar Jón Þór Hauksson var þjálfari liðsins.
Valið á Natasha var til umræðu í hlaðvarpsþættinum Dr. Football í dag. „Síminn fór á fleygiferð um helgina, sem gerist ekki oft. Steini Halldórs var að velja landsliðshóp og ég veit hversu gegnheill gæi Steini er í þessum bransa,“ sagði Hjörvar Hafliðason stjórnandi þáttarins.
Hjörvar segir að Keflvíkingar séu ekki sáttir að um leið og Natasha sé mætt í Breiðablik þá fái hún kallið í landsliðið. Þorsteinn Halldórsson sem stýrir landsliðinu hætti með Breiðablik snemma á árinu til að taka við landsliðinu.
„Leikmaður Keflavíkur sem hafði verið þar lengi, henni gekk vel þar og skipti yfir í Breiðablik. Beint í landsliðið, ég þurfti að róa mitt fólk á Suðurnesjunum. Keflvíkingar vilja meina að þetta hafi verið þannig ´Þú kemur í Breiðablik og verður valin í landsliðið´. Þeir eru ekki sáttir, ég sagði að mér þætti þetta mjög ólíklegt,“ sagði Hjörvar.
Umræðuna má heyra hér að neðan.