Hermann Hreiðarsson aðstoðarþjálfari U21 árs landsliðsins er ekki með liðinu í verkefninu sem nú er í gangi. Vakti það athygli þegar nafn hans var ekki á skýrslu í sigri liðsins gegn Liechtenstein.
Í stað Hermanns var mættur Ólafur Kristjánsson sem var sagt upp hjá Esbergj í Danmörku í vor. Ólafur hefur skoðað næstu skref sín á ferlinum síðustu mánuði.
Hermann sem var ráðinn í starfið í sumar átti ekki heimangengt en hann var ráðinn þjálfari ÍBV í efstu deild karla á dögunum. Óvíst er hvort hann haldi áfram með U21 árs liðið.
„Það var mikið að gera hjá Hermanni og hann baðst undan þessari ferð. Við eigum eftir að fara betur yfir hlutina með honum og framhaldið,“ sagði Klara Bjartmarz framkvæmdarstjóri KSÍ í samtali við 433.is.
Knattspyrnusambandið heyrði þá í Ólafi sem var fljótur að stökkva á tækifærið. „Óli var mjög spenntur fyrir þessu og stökk til.“
U21 liðið mætir Grikklandi á útivelli á morgun en liðið vann góðan sigur á Liechtenstein á föstudag. Davíð Snorri Jónasson er þjálfari liðsins en hann getur vafalítið nýtt sér reynslu og þekkingu Ólafs.