Fréttin hefur verið uppfærð:

Valsmenn hafa eytt færslu sinni sem birt var á Twitter síðu félagsins þar sem fullyrt var að Hannes Þór Halldórsson hefði verið rekinn frá félaginu.

„Þetta var misheppnað grín á milli sjálfboðaliða sem voru að gera þetta, þetta er ömurlegt. Það er búið að biðja Hannes afsökunar á þessu,“ sagði Sigurður Kristinn Pálsson framkvæmdarstjóri Vals í samtali við 433.is.

Er þetta þvert á yfirlýsingu félagsins og það sem Hannes Þór Halldórsson segir í einkaviðtali við 433.is.

Meira:
Hannes Þór um endalokin á Hlíðarenda „Þarf að melta stöðuna og tek næstu vikur í það“

Færslan stóð á Twitter í um fimm mínútur en þar var fyrirsögnin. „HANNES ÞÓR HALLDÓRSSON REKINN!!“

Merktir við færsluna voru nokkrir fjölmiðlar en þar á meðal var RÚV og Morgunblaðið.

Hannes og Valur náðu samkomulagi um starfslok í dag. „Ég held að staðan hafi verið þannig, það var bara ein leið út úr þessu. Báðir aðilar fundu það, við fórum að ræða þennan möguleika og þetta var niðurstaðan sem komumst að,“ segir Hannes Þór í viðtali við 433.is um málið.

Hannes gekk í raðir Vals fyrir tímabilið 2019, það tímabil reyndist öllum í Val erfitt og Hannesi þar á meðal. Sumarið 2020 varð Valur Íslandsmeistari og var Hannes besti markvörður deildarinnar. Sumarið 2021 var svo erfitt á Hlíðarenda en Hannes var jafn besti leikmaður liðsins og einn allra besti markvörður deildarinnar.