Vanda Sigurgeirsdóttir formaður KSÍ og stjórn hennar hafa birt fundargerð frá stjórnarfundi 3 nóvember síðastliðinn. Þar kemur fram að búið sé að skipa tvo nýja jafnréttisfulltrúa.
Vanda er að koma sér inn í starf formanns en hún hefur verið við völd í rúman mánuð. Vanda var kosinn til bráðabirgðar en hún stefnir á endurkjör í febrúar þegar ársþing sambandsins fer fram.
„Lögð var fram tillaga um jafnréttisfulltrúa KSÍ (einn frá stjórn og einn af skrifstofu) og samþykkti stjórn að skipa Guðlaugu Helgu Sigurðardóttur úr stjórn og Ómar Smárason af skrifstofu KSÍ sem jafnréttisfulltrúa KSÍ,“ segir í fundargerð KSÍ.
Ómar er einn reyndasti starfsmaðurinn hjá KSÍ. Er hann í dag titlaður yfirmaður samskiptamála og fjölmiðlatengsla.
Þá var einnig samþykkt að Margrét Hafsteinsdóttir færi inn í laga- og leikreglnanefnd og Sigríður Baxter Þorláksdóttir í fræðslunefnd.
