KR-ingar hafa ekki hugmynd um það hvort Óskar Örn Hauksson skrifi undir nýjan samning við félagið eða fari í annað félag. Kemur þetta fram á vef Fréttablaðsins í dag.
„Óskar er með samningstilboð á borðinu frá okkur. Hann liggur undir feldi. Auðvitað viljum við KR-ingar halda honum eins og Rúnar Kristinsson hefur sagt í viðtölum. Hvað gerist verður svo að koma í ljós,“ segir Páll Kristjánsson formaður KR við Fréttablaðið.
Fram kom í gær á vef Fótbolta.net að Óskar Örn hafi átt í viðræðum við Stjörnuna og væri líklegur til þess að fara þangað.
Óskar Örn hefur verið í herbúðum KR í fjórtán ár og er í hópi bestu leikmanna í sögu félagsins.
Óskar er 37 ára gamall en hjá KR hefur hann orðið Íslandsmeistari þrisvar sinnum og tvisvar sinnum bikarmeistari.