Framtíð Alberts Guðmundssonar sóknarmann AZ Alkmaar í Hollandi er í lausu lofti. Samningur hans er á enda næsta sumar og ekkert þokast áfram í viðræðum um nýjan samning.
Óhætt er að fullyrða að hinn 24 ára gamli Albert er í sínu besta formi á ferlinum. Hann á í fyrsta sinn algjörlega fast sæti í byrjunarliði AZ og hefur staðið sig vel.
„Ég er að renna út af samningi hjá AZ næsta sumar. Ég hef verið í viðræðum þar sem ganga hægt núna. Það er mjög óljóst hvað gerist á næstu vikum eða í sumar,“ sagði Albert á fréttamannafundi í gær. Albert er nú einn af lykilmönnum íslenska landsliðsins. Hann verður í stóru hlutverki gegn Rúmeníu í undankeppni HM á morgun.
„Ég reyni að spila eins vel og ég get til að sanna mig fyrir hverjum sem er. Þá vonandi gerist eitthvað gott í sumar.“
Albert lokar ekki á það að vera áfram hjá AZ. „Ég loka ekki neinum dyrum varðandi það, ég kíki á alla möguleika sem ég hef. Ég hef heyrt af áhuga annara liða en ekkert sem ég get sagt. Ég má ekki tala við aðra klúbba eins og er, það er ekkert á borði.“