,,Er fyrst og fremst svekktur með að ná ekki í þrjú stig en bara gaman að skora fyrir landsliðið, geggjuð sending frá Birki og ég setti hann bara á fjær,“ sagði Ísak Bergmann Jóhannesson við RÚV eftir jafntefli Íslands gegn Armenum í undankeppni HM í kvöld.

Ísak kom inn á sem varamaður í hálfleik og lék afar vel. Hann skoraði jöfnunarmark Íslands á 77. mínútu.

Með markinu varð hann yngsti markaskorari Íslands. Bætti hann þar met frænda síns, Bjarna Guðjónssonar.

,,Ég vissi reyndar af því Bjarni frændi minn átti metið. Ég var svolítið með markmið að slá það. Ég vissi að ef ég myndi skora í september eða október þá myndi ég slá það,“ sagði Ísak.

Ísak fékk gult spjald í leik kvöldsins og missir vegna þeim af þeim næsta sökum leikbanns.

,,Fyrsta sem ég hugsaði þegar ég fór út af var að ég yrði í banni og geti ekki hjálpa liðinu. Mér finnst það mjög leiðinlegt en það er bara áfram gakk.“

Ísland mætir Lichtenstein á mánudagskvöld. Ísak segir markmiðið vera skýrt, að sigra leikinn.

,,Við ætlum fyrst og fremst að reyna að vinna leikinn. Við höfum ekki náð að vinna eins marga leiki og við hefðum viljað. Við unnum þá úti og ætlum að reyna að gera það líka heima.“