Íslenska karlalandsliðið í knattspyrnu dvelur ekki á Hilton hótelinu við Suðurlandsbraut eins og venjan er. Liðið hefur undanfarin ár dvalið á hótelinu fyrir alla heimaleiki liðsins.
Breyting er á að þessu sinni en landsliðinu var hent út af Hilton hótelinu af tölvuleikjaspilurum. Um er að ræða Heimsmeistaramót í tölvuleiknum League of Legends.
Allt hótelið er leigt undir spilara á mótinu en fréttamönnum er meinaður aðgangur að mótinu sem er afar vel sótt. „Þeir borga betur en við,“ sagði starfsmaður KSÍ í samtali við 433.is.
Segja má þó að íslenska liðið sé komið heim. Liðið dvelur á Icelandair Hotel Reykjavík Natura sem var hótel liðsins í mörg ár.
Arnar Þór Viðarsson þjálfari og Eiður Smári Guðjohnsen þekkja hótelið betur en flestir. Hótelið var notað í flest öllum verkefnum þeirra sem leikmenn liðsins.
Landsliðið breytti um hótel um það leyti sem Ólafur Jóhannesson var þjálfari liðsins. Ólafur lét af störfum árið 2011 og því eru meira en tíu ár frá því að landsliðið dvaldi síðast við flugvöllinn í Reykjavík.