Jamie Carragher sérfræðingur Sky Sports segir að Liverpool verði að ganga hratt til verks og klára nýjan samning við Mo Salah.
Salah hefur verið hreint magnaður í upphafi þessa tímabils. Salah var á skotskónum í 2-2 jafntefli gegn Manchester City í gær.
„Það er enginn í heiminum að spila betur þessa dagana,“ sagði Carragher.
„Frammistaða hans og allar tölur í upphafi tímabils hafa verið frábærar. Ég hef aldrei séð Salah betri.“
„Ég hef haldið þessu fram undanfarið að Salah er einn besti leikmaður í sögu Liverpool. Ian Rush, Roger Hunt og fleiri. Salah er á þeim stað, hann labbar inn í besta Liverpool lið sögunnar.“
Salah er með samning við Liverpool til ársins 2023 en viðræður um nýjan samning hafa staðið yfir.
„Liverpool hefur ekki efni á því að klára ekki samning við hann. Félagið gæti misst hann á næstu tveimur árum. Það er nauðsynlegt að hann skori mörk fyrir Liverpool þegar hann er á toppnum í leik sínum.“