Ronald Koeman var rekinn frá Barcelona í gær, hann fékk að vita um uppsögnina um borð í flugvél þegar reiður forseti félagsins talaði við hann. Liðið var á leið heim til Katalóníu eftir tap í La Liga.
Sport segir frá þessu en stjórn félagsins ákvað í gær að reka Koeman úr starfi. Koeman fær 10 milljónir punda í sinn vasa eftir uppsögnina.
1,8 milljarður kemur sér vel fyrir Koeman sem verður án starfs næstu vikurnar.
Barcelona tapaði á útivelli gegn Rayo Vallecano í spænsku La Liga í gær. Radamel Falcao gerði eina mark leiksins þegar hálftími var liðinn. Memphis Depay brenndi af víti fyrir gestina á 72. mínútu. Barcelona er í níunda sæti deildarinnar með 15 stig eftir tíu leiki. Rayo Vallecano er í fimmta sæti með 19 stig.
Vandræði Barcelona hafa mikið verið í umræðunni og var ákveðið að reka Koeman. Hann hafði stýrt liðinu í eitt og hálft tímabil.
Xavi er ein af hetjum félagsins en hann hefur verið sigursæll í Katar og er klár í að taka skrefið heim til Katalóníu. Sport á Spáni segir að Jurgen Klopp heilli forráðamenn Barcelona. Ólíklegt er þó að hægt sé að lokka hann frá öflugu liði Liverpool.
