Barcelona þarf að borga 840 þúsund pund eða 150 milljónir íslenskra króna fyrir Xavi til að fá hann frá Al-Sadd í Katar.
Börsungar vilja Xavi til að taka við liðinu. Barcelona hefur náð munnlegu samkomulagi við Xavi um að taka við.
Ronald Koeman var rekinn frá Barcelona í gær, hann fékk að vita um uppsögnina um borð í flugvél þegar reiður forseti félagsins talaði við hann. Liðið var á leið heim til Katalóníu eftir tap í La Liga.
Sport segir frá þessu en stjórn félagsins ákvað í gær að reka Koeman úr starfi. Koeman fær 10 milljónir punda í sinn vasa eftir uppsögnina.
Barcelona tapaði á útivelli gegn Rayo Vallecano í spænsku La Liga í gær. Radamel Falcao gerði eina mark leiksins þegar hálftími var liðinn. Memphis Depay brenndi af víti fyrir gestina á 72. mínútu. Barcelona er í níunda sæti deildarinnar með 15 stig eftir tíu leiki. Rayo Vallecano er í fimmta sæti með 19 stig.
Xavi er ein stærsta goðsögnin í sögu Barcelona en hann átti góðu gengi að fagna sem leikmaður en fær nú það vandasama verkefni að koma félaginu aftur í fremstu röð.