Daily Star heldur því fram að Mauricio Pochettino, stjóri Paris Saint-Germain, sé efstur á óskalista Manchester United, verði Ole Gunnar Solskjær látinn fara.
Pressa er komin á norska stjórann eftir 0-5 tap gegn Liverpool á heimavelli í síðustu umferð ensku úrvalsdeildarinnar, auk lélegra úrslita undanfarið.
Það er þó útlit fyrir að Solskjær fái að stýra Man Utd gegn Tottenham um næstu helgi.
Pochettino á góðar minningar frá ensku úrvalsdeildinni. Hann stýrði þar Tottenham og Sothampton við góðan orðstýr. Þá kom hann fyrrnefnda liðinu í úrslitaleik Meistaradeildar Evrópu.
Sem fyrr segir er hann nú við stjórnvölinn hjá PSG í Frakklandi. Liðið er langefst í deildinni þar, með 7 stiga forskot strax eftir ellefu umferðir.
Hjá PSG eru leikmenn á borð við Lionel Messi, Neymar, Kylian Mbappe og svo lengi mætti telja.
Menn hafa því velt því upp hvort Pochettino myndi yfirgefa svoleiðis verkefni fyrir Man Utd á þessum tímapunkti.