Richard Arnold framkvæmdarstjóri Manchester United hætti við alla fundi í dag til að geta rætt um framtíð Ole Gunnar Solskjær hjá félaginu. Guardian segir frá.
Arnold mun í dag funda með Joel Glazer einum af eigendum félagsins um hvað skal gera.
Enginn neyðarfundur fór fram hjá stjórn Manchester United í gær eftir 0-5 tap gegn Liverpool á heimavelli. Samkvæmt Guardian er Antonio Conte klár í að taka við ef Solskjær verður rekinn.
Í frétt Guardian sem er talið mjög áreiðanlegur miðill segir að leikmenn séu farnir að efast stórlega um hæfni Solskjær. Þeim líkar við hann sem persónu en efast um hæfni hans.
Staða Solskjær er erfið, liðið hefur spilað illa á þessu tímabili og niðurlæging á heimavelli gæti verið síðasti naglinn í kistuna. Enskir veðbankar telja að starfa Solskjær hangi á bláþræði. Veðbankinn Skybet gefur stuðulinn 1,25 á það að Solskjær verði rekinn. Slíkur stuðull bendir yfirleitt til þess að eitthvað sé í vændum.
Solskjær er að hefja sitt þriðja heila tímabil og eftir góða takta í starfi virðist norski stjórinn nú vera á endastöð.