Íslenska kvennalandsliðið vann frábæran sigur á Tékklandi í undankeppni HM 2023 á Laugardalsvelli í kvöld.
Ísland byrjaði leikinn vel og komst yfir á 12. mínútu. Þá átti Karólína Lea Vilhjálmsdóttir sendingu fyrir mark Tékka. Berglind Björg Þorvaldsdóttir náði að setja fótinn í boltann og þaðan fór hann í stöngina og í Barbora Votikova, markvörð gestanna, og inn.
Tékkland sótti í sig veðrið næstu mínútur eftir markið en tókst ekki að ógna almennilega. Staðan í hálfleik var 1-0 eftir fínasta fyrri hálfleik hjá íslenska liðinu.
Ísland byrjaði seinni hálfleikinn einnig af krafti. Dagný Brynjarsdóttir tvöfaldaði forystuna á 58. mínútu. Þá skoraði hún með skalla eftir góða fyrirgjöf frá Hallberu Guðnýu Gísladóttur.
Gestirnir komu sér betur inn í leikinn eftir markið og ógnuðu fram á við. Það var hins vegar Ísland sem skoraði næsta mark. Það gerði Svava Rós Guðmundsdóttir. Guðný Árnadóttir átti þá fyrirgjöf sem Gunnhildur Yrsa Jónsdóttir kom á Svövu sem skoraði.
Gunnhildur skoraði svo fjórða markið. Það gerði hún eftir sendingu frá Guðnýu.
Lokatölur 4-0. Frábær sigur Íslands. Liðið er nú með 3 stig eftir tvo leiki í riðlinum.