Kristján Óli Sigurðsson, sérfræðingur Þungavigtarinnar, fullyrðir að Eysteinn Húni, hafi verið rekinn frá Pepsi-Max deildar liði Keflavíkur og að Haraldur Guðmundsson, sem lét af störfum hjá Reyni Sandgerði á dögunum, muni koma inn í þjálfarateymi liðsins með Sigurði Ragnari Eyjólfssyni.
,,Eysteinn er farinn, það er búið að reka hann. Haraldur Guðmundsson hætti hjá Reyni Sandgerði í gær og það verður líklegast tilkynnt á næstu mínútum að hann verði aðstoðarþjálfari Sigga Ragga hjá Keflavík eða meðþjálfari. Hann er gamall fyrirliði úr Keflavík og einn dáðasti sonur Suðurnesjana,“ sagði Kristján Óli Sigurðsson, einn af sérfræðingum hlaðvarpsþáttarins Þungavigtarinnar.
Samstarf Eysteins og Sigurðar Ragnars hefur verið stormasamt og Sigurður Ragnar staðfesti það í viðtali í sjónvarpsþættinum 433.is fyrr á árinu að það hafi reynst erfitt fyrir sig að starfa sem aðalþjálfari með öðrum aðalþjálfara en þeir hafi þó leyst það fagmannlega á endanum.
„Það var nýtt fyrir mér að vinna með öðrum, að við séum báðir aðalþjálfarar. Það tók okkur langan tíma að fá það til fúnkera vel, í dag fúnkerar það mjög vel…Við höfum reynt að nýta styrkleika hvor annars, það tekur oft langan tíma að komast að ákvörðun þegar það eru tveir. Sérstaklega þegar báðir eru þrjóskir eins og við erum, við höfum okkar hugmyndafræði. Stundum þarf maður að gefa eftir, það fær mann til að hugsa um hvað manni finnst mikilvægt. Við reynum að vinna þetta saman, þannig að liðið nái árangri,“ sagði Sigurður Ragnar í sjónvarpsþættinum 433.is fyrr á árinu.
Undir stjórn Eysteins og Sigurðar Ragnars enduðu nýliðar Keflavíkur í 10. sæti á nýafstöðnu tímabili í Pepsi Max deildinni með 21 stig, einu stigi frá fallsæti
