Patrice Evra, fyrrum leikmaður Manchester United og fleiri liða, hefur opnað sig með það að hafa verið misnotaður kynferðislega aðeins 13 ára gamall. Frakkinn, sem er fertugur, segir frá þessu í sjálfsævisögu sinni.
Atvikið átti sér stað heima hjá kennara Evra. ,,Ég fékk fiðrildi í magann þegar ég átti að fara að gista þar í lok skólaárs. Þetta gat ekki haldið áfram. Ég sagði mömmu minni að ég gæti ekki verið þarna lengur,“ skrifar hann.
,,Á síðasta kvöldinu mínu hjá manninum, þegar hann vissi að ég væri að snúa aftur til fjölskyldu minnar, setti hann typpið á mér upp í sig.“
Hann gaf svo mikilvæg skilaboð til barna sem gætu verið í sömu stöðu og hann var í.
,,Ef þú ert barn sem ert að lesa þetta og það er verið að brjóta á þér þá verðurðu að segja frá. Ekki skammast þín því það er ekkert til að skammast sín fyrir. Reyndu að takast á við þessa martröð með því að segja frá.“
,,Ég vil ekki að fólk vorkenni mér. Þetta er erfið staða. Móðir býst ekki við því að heyra um svona frá barninu sínu. Hún spurði mig hvað væri að og spurði mig af hverju ég vildi ekki gista heima hjá kennaranum.“
Evra sagði móður sinni aðeins frá atburðunum nýlega.
,,Núna, 40 ára gamall, segi ég henni sannleikann. Það var mikið áfall fyrir hana. Hún var mjög reið og bað mig afsökunar. Hún sagði mér að setja þetta ekki í bókina, að þetta væri einkamál. Ég sagði henni að þetta snerist ekki um mig, heldur önnur börn. Þá skildi hún mig.“
,,Hún sagði ,,ef þú kærir hann ekki, geri ég það. Ef hann er á lífi mun ég drepa hann.“
Sjálfur hefur Evra ekki íhugað að kæra fyrrum kennara sinn.
,,Það er mikil reiði. Ég veit að mamma og aðrir fjölskyldumeðlimir munu rannsaka þetta og skoða hvort þau geti kært. Ég hef hins vegar grafið þetta svo langt niður að ég hugsa ekki um að kæra.“