Það má segja að Paul Scholes hafi ekki verið í sjöunda himni þrátt fyrir endurkomusigur Manchester United á Atalanta í Meistaradeild karla í kvöld.
United lenti 2-0 undir í fyrri hálfleik en mörk frá Marcus Rashford, Harry Maguire og Cristiano Ronaldo tryggði liðinu stigin þrjú í þeim seinni.
Paul Scholes, fyrrverandi leikmaður Man United og núverandi knattspyrnuspekingur, gagnrýndi frammistöðu sinna manna í fyrri hálfleik.
„Ég skil allan æsinginn en ég var ekki ánægður með fyrri hálfleikinn og það kom í veg fyrir að ég naut seinni hálfleiksins. Ég held að þeir hefðu tapað ef þeir hefðu spilað gegn betra liði í kvöld. Fyrri hálfleikurinn var áhyggjuefni. Þetta leit ekki út eins og lið, það vantaði samheldni – það var áhyggjumerki.“ sagði hann í samtali við BT Sport.
„Geta þeir spilað svona gegn Liverpool? Engan veginn. Geturðu spilað svona gegn Manchester City? Geturðu spilað svona gegn toppliði í Meistaradeildinni?
Ég vil ekki hljóma eins og gleðispillir en þessi fyrri hálfleikur veldur mér miklum áhyggjum,“ sagði Scholes.