Sex leikjum var að ljúka í riðlakeppni Meistaradeildar Evrópu karla í kvöld.
Man United tók á móti Atalanta í F-riðli. United hafði unnið einn og tapað einum í riðlakeppninni fyrir leik kvöldsins og lenti undir á 15. mínútu þegar að Mario Pasalic skoraði eftir sendingu frá Davide Zappacosta. Merih Demiral kom Atalanta í 2-0 þegar hann skallaði boltann í netið eftir hornspyrnu en Demiral var einn á auðum sjó í teignum.
Rashford klóraði í bakkann fyrir heimamenn á 53. mínútu og Harry Maguire jafnaði rúmum 20 mínútum síðar eftir stoðsendingu frá Edinson Cavani sem kom inn á sem varamaður. Þá var komið að Cristiano Ronaldo að fullkomna endurkomusigur heimamanna. Hann stökk manna hæst í teignum og stangaði boltann í netið eftir fyrirgjöf frá Luke Shaw þegar að níu mínútur voru eftir af venjulegum leiktíma.
Lokatölur 3-2 fyrir Rauðu djöflana sem sitja á toppi F-riðils eftir úrslit kvöldsins.
Chelsea fór létt með Malmö á heimavelli í leik liðanna í H-riðli. Daninn Andreas Christensen kom Chelsea yfir á eftir níu mínútna leik með sínu fyrsta marki fyrir félagið. Kai Havertz kom sér einnig á blað og Jorginho skoraði tvö mörk úr vítaspyrnum í sitthvorum hálfleiknum.
Þá lagði Bayern Munchen 4-0 sigur á Benfica. Það var markalaust fram á 70. mínútu en þá setti Bayern í fjórða gír og skoraði fjögur mörk. Leroy Sané skoraði meðal annars tvö og lagði upp eitt. Bayern er efst í E-riðli með þrjá sigra af þremur.
Juventus er einnig efst í sínum riðli með fullt hús stiga eftir 1-0 sigur á Zenit í kvöld. Villareal vann þá góðan 4-1 útisigur á Young Boys og Lille og Sevilla gerðu markalaust jafntefli.
Benfica 0 – 4 Bayern
0-1 Leroy Sané (‘70)
0-2 Sousa Souares (’80, sjálfsmark)
0-3 Lewandowski (’82)
0-4 Leroy Sané (’85)
Man United 3 – 2 Atalanta
0-1 Mario Palasic (’15)
0-2 Merih Demiral (’29)
1-2 Marcus Rashford (’53)
2-2 Harry Maguire (’75)
3-2 Cristiano (’81)
Young Boys 1 – 4 Villareal
0-1 Yeremi Santos (‘6)
0-2 Gerard Moreno (’16)
1-2 Meshack Elia (’77)
1-3 Alberto Moreno (’89)
1-4 Samuel Chukwueze (’90+2)
Lille 0 – 0 Sevilla
Chelsea 4 – 0 Malmö
1-0 Christensen (‘9)
2-0 Jorginho (’21, víti)
3-0 Kai Havertz (’48)
4-0 Jorginho (’57, víti)
Zenit St Petersburg 0 – 1 Juventus
0-1 Dejan Kukusevski (’86)