Jose Enrique, fyrrum leikmaður Liverpool og Newcastle United, hvetur fyrrverandi liðsfélaga sinn, Steven Gerrard, til þess að taka við Newcastle ef honum býðst það.

Gerrard hefur gert frábæra hluti hjá Rangers og stýrði liðinu meðal annars til sigurs í skosku úrvalsdeildinni á síðasta tímabili. Gerrard hefur verið orðaður við knattspyrnustjórastöðuna hjá Newcastle og nú þegar búið er að reka Steve Bruce úr stöðunni hvetur Jose Enrique hann um að taka við liðinu ef honum býðst það.

,,Ef hann fær tilboð frá félaginu og telur það vera rétt skref fyrir sig á ferlinum þá yrði ég glaður fyrir hans hönd og Newcastle. Hann er topp manneskja, frábær knattspyrnustjóri og gæti kennt leikmönnunum margt,“ sagði Enrique í viðtali við BeMyBet.

Gerrard er ekki talinn líklegur til þess að taka við Newcastle á þessari stundu en það getur margt breyst á örskotstundu í knattspyrnuheiminum. Ef hann tekur ekki við Newcastle þá bíður hann eftir því að dyrnar opnist hjá Liverpool þegar að Jurgen Klopp, núverandi knattspyrnustjóri liðsins, ákveður að stíga til hliðar hvenær sem það nú verður.