Barcelona og Dynamo Kyiv mættust í E-riðli í Meistaradeild Evrópu í kvöld. Leikið var á Nou Camp leikvangnum í Barcelona.

Gerard Pique skoraði eina mark leiksins á 36. mínútu þegar hann tók boltann viðstöðulaust á lofti eftir fyrirgjöf frá Jordi Alba.

Philippe Coutinho, Ansu Fati og Sergio Aguero komu allir inn á er spænsku risarnir tryggðu sér sinn fyrsta sigur í riðlakeppninni í ár eftir tvö 3-0 töp gegn Benfica og Bayern Munchen, en þau mætast seinna í kvöld.

Barcelona er nú í 3. sæti riðilsins með þrjú stig en Bayern er efst með sex stig og Benfica fjögur. Dynamo Kyiv situr á botninum með eitt stig.

Þá vann Salzburg 3-1 sigur á VfL Wolfsburg í G-riðli.

Karim Adeyemi kom Salzburg yfir eftir þriggja mínútna leik en Lukas Nmecha jafnaði metin á 15. mínútu. Noah Okafor tryggði heimamönnum stigin þrjú með tveimur mörkum í síðari hálfleik. Salzburg er efst í G-riðli með sjö stig eftir þrjár umferðir. Wolfsburg er í 3. sæti með tvö stig.