KR-ingar ætla að skora nóg af mörkum næsta sumar en félagið hefur samið við Sigurð Bjart Hallsson og Stefan Ljubicic. Þetta kemur fram í hlaðvarpsþættinum Dr. Football í dag.
Báðir leikmennirnir munu skrifa undir samning við félagið. Sigurður Bjartur skoraði 17 mörk í 21 leik fyrir Grindavík í Lengjudeildinni í sumar. Samningur hans við félagið var á enda.
Stefan skoraði hins vegar sex mörk í 21 leik í efstu deild fyrir HK og þrjú mörk í þremur bikarleikjum. Þessi 22 árs gamli hávaxni sóknarmaður lék þrjá leiki 15 ára með Keflavík í efstu deild áður en hann fór til Brighton þar sem hann lék með unglinga- og varaliðum í þrjú ár.
KR-ingar fengu Evrópusæti um helgina þegar ljóst var að Víkingur varð bikarmeistari. Góður endasprettur KR tryggði liðinu þriðja sætið.
Fyrir er KR með Kjartan Henry Finnbogason, Kristján Flóka Finnbogason og Guðjón Baldvinsson í fremstu víglínu.
