Talskona lögreglunnar í Manchester telur að Gylfi Þór Sigurðsson verði áfram laus gegn tryggingu. Frá þessu segir hún í samtali við Fréttablaðið.

Gylfi Þór hefur verið laus gegn tryggingu í tæpa þrjá mánuði. Gylfi var handtekinn um miðjan júlí í Manchester grunaður um kynferðisbrot gegn ólögráða einstaklingi. Honum var sleppt úr haldi skömmu síðar og hefur síðan verið laus gegn tryggingu síðan. Lögreglan í Manchester er með málið til rannsóknar.

Talskona lögreglunnar í Manchester mun senda frá sér yfirlýsingu um málið um leið og málið kemur á borð þeirra.

Talið er að rannsókn lögrelgu muni halda áfram en talað hafði verið um að Gylfi yrði laus til 16 október sem var á laugardag. Samkvæmt lögreglunni er hann enn laus gegn tryggingu og búast má við að hann verði það áfram.

Að lokinni rannsókn tekur lögregla ákvörðun um hvort málið verði fellt niður eða ákæra verði gefinn út.

Gylfi er í hópi bestu knattspyrnumanna í sögu Íslands en afrek hans með landsliðinu höfðu skrifað hann í sögubækurnar. Hann er samningsbundinn Everton á Englandi en félagið setti hann í leyfi á meðan rannsókn málsins er í gangi. Samningur Gylfa við Everton rennur út næsta sumar.