Arsenal og Crystal Palace mættust í lokaleik 8. umferðar ensku úrvalsdeildarinnar í kvöld. Leikið var á Emirates vellinum í Lundúnum.
Pierre-Emerick Aubameyang kom heimamönnum yfir með marki úr þröngu færi eftir að boltinn datt fyrir hann í teignum. Palace menn ógnuðu marki Arsenal í fyrri hálfleik en rangar ákvarðanatökur urðu til þess að Arsenal leiddi 1-0 þegar gengið var til búningsklefa.
Christian Benteke jafnaði metin fyrir Palace þegar að fimm mínútur voru liðnar af seinni hálfleik með flottri afgreiðslu eftir undirbúning frá Jordan Ayew. Alexandre Lacazette blés lífi í heimamenn með innkomu sinni af varamannabekknum en það voru Palace menn sem tóku forystuna sex mínútum síðar.
Conor Gallagher vann boltann á miðsvæðinu, renndi honum á Michael Olise sem gaf boltann á Odsonne Edouard sem hamraði hann í slána og inn.
Patrick Vieira, þjálfari Crystal Palace, fagnaði markinu vel og innilega en honum tókst ekki að sækja sigur gegn sínu gamla félagi því Alexandre Lacazette jafnaði metin fyrir heimamenn á síðustu stundu eftir rugling í vörn Crystal Palace og lokatölur 2-2.
Arsenal er í 12. sæti með 11 stig. Crystal Palace er í 14. sæti með 8 stig.
Arsenal 2 – 2 Crystal Palace
1-0 Aubameyang (‘8)
1-1 Benteke (’50)
1-2 Eduouard (’73)
2-2 Lacazette (’90+5)