Hátt í 5 þúsund miðar hafa verið seldir á bikarúrslitaleik ÍA og Víkings í dag en þetta kemur fram í grein á Rúv í dag. Leikurinn hefst klukkan 15:00 á Laugardalsvelli og verður í beinni á Stöð 2 sport.

Víkingur getur orðið fyrsta íslenska liðið í knattspyrnu karla til að vinna tvöfalt síðan KR gerði það árið 2011. Einungis fjögur lið hafa unnið deildar- og bikarmeistaratitil karla á sama tímabili og er ÍA eitt þeirra en liðið hefur unnið tvöfalt fjórum sinnum líkt og KR.

Víkingur er ríkjandi bikarmeistari og þykir líklegra til sigurs í úrslitaleiknum eftir eftir að hafa fangað deildarmeistaratitilinn úr höndum Valsmanna í sumar. ÍA tókst að halda sæti sínu í efstu deild með ævintýralegum hætti í lokaleik tímabilsins og vonast til að hreppa bikarinn í tíunda sinn í sögu félagsins.

4900 miðar höfðu verið seldir á leikinn í morgun en 6000 voru í boði fyrir leik. Nærri 4300 aðdáendur mættu á úrslitaleik FH og Víkings í fyrra en undanfarin fimm ár hefur áhorfendafjöldi á bikarúrslitaleikjum verið á milli þrjú og fjögur þúsund manns.