Aurah Ruiz, kærasta knattspyrnumannsins Jese Rodriguez, neitar því að hafa keyrt yfir leikmanninn á dögunum. Myndband fór í dreifingu fyrr í vikunni þar sem mátti sjá mann haltra í burtu eftir að keyrt hafði verið á hann. Sá maður á að hafa verið Jese.

,,Ég hef ekki keyrt yfir neinn. Þetta er alvarleg lygi. Ég mun ekki láta það viðgangast að fólk segi mig hafa ekið yfir maka minn,“ sagði Ruiz.

The incident of Jese Rodriguez being hit by his girlfriend Aruah Ruiz was recorded by someone. pic.twitter.com/HWalTYlhvH

— FOOTBALLFANSSTUFF (@officialffsnews) October 13, 2021

Samband Jese og Ruiz hefur verið stormasamt. Þau hafa til að mynda farið gegn hvoru öðru fyrir rétt þar sem Ruiz sakaði þennan fyrrum leikmann Paris Saint-Germain og Real Madrid um að sinna ekki hlutverki sínu sem faðir sonar þeirra. Komist var að samkomulagi í því máli í fyrra.

,,Ég veit að það hefur margt komið upp á milli okkar sem við erum ekki stolt af en við elskum samt hvort annað og ég myndi aldrei keyra yfir hann,“ sagði Ruiz.

Sjálfur tók Jese fyrir slúðrið á miðvikudag eftir æfingu með félagi sínu, Las Palmas. ,,Virðið mig og hættið að birta falsfréttir.“

Jese kom til Las Palmas snemma á þessu ári eftir að hafa farið á hinum ýmsu lánssamningum frá PSG á árunum sínum fjórum þar. Frá París var hann lánaður til Stoke City, Real Betis, Sporting og Las Palmas.