Kylian Mbappe, leikmaður Paris Saint-Germain, mun ekki skrifa undir nýjan samning við félagið, sama hvaða fjárhæðir það mun bjóða honum. Þetta kemur fram í frétt AS.
Samningur hins 22 ára gamla Mbappe við PSG rennur út næsta sumar. Hann hefur verið sterklega orðaður við Real Madrid.
Spænska félagið bauð 189 milljónir punda í hann síðasta sumar. Mörgum þótti ótrúlegt þegar Parísarliðið hafnaði tilboðinu vegna samningsstöðu Frakkans.
Samkvæmt þessari frétt AS virðist sem svo að Mbappe hafi gert upp hug sinn um að ganga frítt til liðs við Real Madrid næsta sumar. Myndi hann þá verða hluti af uppbyggingu hjá félaginu.
Tölfræði Mbappe fyrir PSG frá því hann kom til félagsins frá Monaco árið 2017 er ótrúleg. Hann hefur skorað 136 mörk og lagt upp önnur 66 í 182 leikjum með Parísarliðinu.