Steve Bruce, knattspyrnustjóri Newcastle United, mun á sunnudaginn stýra sínum 1000 leik þegar Newcastle tekur á móti Tottenham á St. James’ Park.

Mohammad bin Salman, krónprins Sádí Arabíu og fjárfestingahópur í kringum hann hafa gengið frá kaupum á Newcastle eftir 18 mánaða ferli og hyggjast fjárfesta miklum fjárhæðum í félagið meðal annars með því að ráða nýjan þjálfara.

Bruce gerir sér grein fyrir því að hann sitji í einu mest spennandi knattspyrnustjórasæti í heiminum um þessar mundir en hann hefur ekki gefið upp vonina um að halda áfram sem knattspyrnustjóri félagsins.

,,Hver myndi ekki vilja reyna fyrir sér í þessum aðstæðum? Ég ætla að minnsta kosti ekki að gefa upp vonina,“ sagði Bruce á blaðamannafundi í dag er hann var spurður að því hvort hann gæti unnið nýja eigendur yfir á sitt band.

,,Ég væri til í að reyna fyrir mér í þessum aðstæðum og ég er viss um að það eru aðrir knattspyrnustjórar sem vilja það líka Það eru spennandi tímar framundan hjá félaginu það eitt er víst,“ sagði Steve Bruce, knattspyrnustjóri Newcastle United.