Arnar Bergmann Gunnlaugsson, þjálfari Víkings Reykjavíkur, segir leikmenn sína staðráðna í að skrá nafn sitt á spjöld sögunnar. Víkingur Reykjavík mætir ÍA í úrslitaleik bikarkeppni karla á laugardaginn.
Mikil spenna er fyrir leiknum, Víkingar reyna að verja titilinn og Skagamenn geta nælt í sinn fyrsta bikarmeistaratitil síðan árið 2003 sem yrði þá tíundi bikarmeistaratitilinn í sögu félagsins karlamegin.
Víkingar geta skráð sig á spjöld sögunnar sem handhafar bæði Íslands- og bikarmeistaratitilsins, það hefur ekki gerst áður í sögu félagsins.
Þetta verður einnig síðasti leikur varnarmannanna og fyrrum landsliðsmannanna Sölva Geirs Ottesen og Kára Árnasonar á ferlinum. Arnar segir leikmenn staðráðna í því að reyna hjálpa þessum reynsluboltum með að enda ferilinn
,,Það verða eiginlega bara lokaorðin er við höldum út á völl, að skrifa sig á spjöld sögunnar og hjálpa þeim að enda ferilinn sinn eins og þeir eiga skilið að enda ferilinn sinn.“
,,Ef að þeir (Kári og Sölvi) hefðu verið spurðir að því þegar að þeir hófu ferilinn sinn hvernig þeir vildu að tveir af síðustu leikjum þeirra myndu verða þá yrði svarið örugglega að einn leikurinn væri úrslitaleikur um Íslandsmeistaratitilinn og næsti yrði um bikarmeistaratitilinn,“ sagði Arnar Bergmann Gunnlaugsson, þjálfari Víkings Reykjavíkur.
Það yrði ótrúlegur endir og í raun fullkominn endir á ferli Kára og Sölva að hampa bikarmeistaratitlinum og innsigla tvennuna.
,,Þetta er handrit sem er voðalega erfitt að skilja, þetta er eiginlega fáranlega gott handrit,“ sagði Arnar Bergmann Gunnlaugsson, þjálfari Víkings Reykjavíkur í samtali við blaðamann 433.is