Arnar Bergmann Gunnlaugsson, þjálfari Víkings Reykjavíkur, er spenntur fyrir því að mæta sínu uppeldisfélagi í bikarúrslitaleik karla á laugardaginn. Arnar hóf feril sinn með ÍA og varð Íslandsmeistari í tvígang sem leikmaður með liðinu.
Arnar hikar ekki þegar hann er spurður að því af blaðamanni 433.is hvort að Skagahjartað verði lagt til hliðar á laugardaginn.
,,Já algjörlega. Ég er náttúrulega fæddur og uppalinn á Skaganum og maður vill sínum klúbbi alltaf vel. Það var mjög mikil ánægja hjá mér þegar að ég frétti af því að þeir hefðu bjargað sér frá falli. Ég held að það sé vilji flestra að Skaginn sé í efstu deild og að standa sig vel en á laugardaginn er það Víkingshjartað alla leið,“ var svar Arnars við spurningu blaðamanns.
Tímabilið hjá ÍA í ár hefur verið tvískipt. Þeim gekk heilt yfir illa í Pepsi-Max deildinni en náðu að bjarga sér frá falli á lokametrunum. Þeir hafa tengt saman sigurleiki og Arnar býst við krefjandi leik á laugardaginn.
,,Ég met þá sem hættulega, þeir eru búnir að tengja saman sigurleiki og björguðu sér á ævintýralegan hátt frá falli í deildinni. Það þýðir það að þeir eru fullir sjálfstrausts og upp í skýjunum eðlilega. Þegar að maður hefur sjálfstraust þá hefur maður einhvað extra forskot. Það má þó ekki gleyma því að gengi okkar hefur verið frábært, við höfum unnið tíu leiki í röð og fyrir mig er þetta draumaúrslitaleikur,“