Roy Keane telur að það sé nokkuð augljóst að eitthvað hafi komið upp á milli Raheem Sterling og Pep Guardiola.

Sterling samdi við Manchester City árið 2015 og hefur unnið Ensku úrvalsdeildina þrisvar, deildarbikarinn fjórum sinnum og FA bikarinn einu sinni á tíma sínum hjá félaginu. Á þessum tíma hefur hann spilað yfir 300 leiki og var algjör lykilmaður hjá Guardiola á tímabili.

Sterling var úti í kuldanum hjá Guardiola undir lok síðasta tímabils og með komu Jack Grealish er spilatíminn minni. Sterling er þó lykilmaður í enska landsliðinu en Gareth Southgate er afar hrifinn af kappanum.

„Það er augljóslega eitthvað sem gerðist hjá honum og Pep, það er eitthvað í gangi þarna. Þeir fengu Grealish inn fyrir 100 milljónir punda í hans stöðu í sumar,“ sagði Keane við ITV.

„Hann á 20 mánuði eftir á samningi og það er langur tími. Hann þarf bara að einbeita sér.“

„Southgate er mikill aðdáandi Raheem og hann mun alltaf byrja þar, sama hvaða vandamál er í gangi hjá félagsliðinu hans.“