Mauricio Pochettino, knattspyrnustjóri Paris-Saint Germain, hefur viðurkennt að hafa talið yfirmann knattspyrnumála, Leonardo, vera að grínast í sér þegar að sá síðarnefndi hringdi í hann og tilkynnti honum að Lionel Messi gæti verið á leið til félagsins.
Messi, sem er talinn einn besti knattspyrnumaður allra tíma, kom á frjálsri sölu frá Barcelona í ágúst síðastliðnum.
„Leonardo hringdi í mig og sagði mér að það væri möguleiki á því að Messi væri á leiðinni til okkar. Ég hugsaði með sjálfum mér að hann væri að grínast, en það rann upp fyrir mér síðar að hann væri að segja þetta af alvöru,“ sagði Pochettino í viðtali á dögunum.
Hann greindi einnig frá því að hafa fengið símtal frá Leonardo öll kvöld síðan þá og þangað til að félagsskiptin voru staðfest.
„Ég verð að hrósa Leonardo fyrir þessi fagmannlegu vinnubrögð. Það tók hann aðeins tvo til þrjá daga að ganga frá samningum við besta knattspyrnumann í heimi,“ sagði Mauricio Pochettino, knattspyrnustjóri Paris-Saint Germain.