Heimir Hallgrímsson hefur tekið ákvörðun um að taka ekki við Stjörnunni. Frá þessu greinir Hjörvar Hafliðason á Twitter síðu sinni.
Heimir hafði samkvæmt fréttum verið í viðræðum við Stjörnuna síðustu daga. „Heimir Hallgrímsson verður ekki þjálfari Stjörnunnar. Mjög metnaðarfull tilraun Garðbæinga og munaði litlu segja menn á Garðaflötinni. Núna eru Stjörnumenn í alvöru veseni með að finna þjálfara,“ skrifar Hjörvar á Twitter.
Heimir Hallgrímsson verður ekki þjálfari Stjörnunnar. Mjög metnaðarfull tilraun Garðbæinga og munaði litlu segja menn á Garðaflötinni. Núna eru Stjörnumenn í alvöru veseni með að finna þjálfara.
— Hjörvar Hafliðason (@hjorvarhaflida) October 14, 2021
Heimir var þjálfari íslenska landsliðsins frá 2011 til 2018. Hann kaus þá að hætta með liðið eftir Heimsmeistaramótið.
Heimir fór þá til starfa í Katar og stýrði Al-Arabi í tvö og hálft ár. Hann lét af störfum í Katar en samkvæmt heimildum 433.is hefur fjöldi fyrirspurna komið á borð Heimis.
Heimir hefur farið í viðræður við nokkur félög en ýtt öðrum tilboðum frá sér. Hann hafði legið yfir tilboði Stjörnunnar síðustu daga samkvæmt fréttum en ákvað að lokum að hafna því. Ætla má að Heimir reyni að klófesta starf fyrir áramót en fjöldi deilda er á enda nú undir lok árs. Þar gæti Heimir fengið starf bæði á Norðurlöndum eða í Bandaríkjunum.
Þorvaldur Örlygsson lét af störfum á dögunum. Stjarnan reyndi að ráða Ólaf Jóhannesson sem hafnaði starfinu og tók við FH. Næstur var Heimir í röðinni.
Nú má ætla að Stjarnan reyni að klófesta Ólaf Kristjánsson, Jón Þór Hauksson eða Ágúst Gylfason.