Fréttablaðið segir frá því í kvöld að Gylfi Þór Sigurðsson leikmaður Everton verði áfram laus gegn tryggingu á meðan lögreglan í Manchester skoðar mál hans.
Gylfi var handtekinn í júlí grunaður um kynferðisbrot gegn ólögráða einstaklingi. Gylfi var aðeins í haldi í lögreglu í skamma stund og hefur síðan gengið laus í Bretlandi.
Fram hafði komið í fréttum að Gylfi yrði laus gegn tryggingu til 16 október. Samkvæmt frétt Fréttablaðsins verður hann laus í lengri tíma. Að lokinni rannsókn tekur lögregla ákvörðun um að fella málið niður eða leggja fram ákæru.
Fréttablaðið segir einnig frá því að Gylfi hafi fyrir nokkru flutt til Lundúna þar sem hann heldur nú til.
Gylfi er í hópi bestu knattspyrnumanna í sögu Íslands en afrek hans með landsliðinu höfðu skrifað hann í sögubækurnar. Hann er samningsbundinn Everton á Englandi en félagið setti hann í leyfi á meðan rannsókn málsins er í gangi. Samningur Gylfa við Everton rennur út næsta sumar.
Nánar má lesa um málið á vef Fréttablaðsins