Lucas Hernandez, leikmaður Þýskalandsmeistara Bayern Munchen, er í töluverðum vandræðum eftir að hann braut nálgunarbann gagnvart eiginkonu sinni í stórfurðulegu máli.
Honum hefur nú verið skipað að mæta fyrir dómstóla í Madríd á Spáni þar sem að eins árs fangelsisvist gæti mögulega legið fyrir. Kveða á upp dóm þann 19. október næstkomandi og Hernandez þarf að mæta þangað í eigin persónu.
Atburðurinn sem um ræðir teygir anga sína aftur til ársins 2017 þar sem Hernandez var handtekinn og ásakaður um að hafa ráðist á þáverandi kærustu sína, Ameli de la Osa Llorente.
Á sínum tíma ákvað dómari í Madríd að setja á þau nálgunarbann sem átti að endast í sex mánuði, auk þess áttu þau að sinna samfélagsþjónustu sem samsvaraði 31 degi. Þrátt fyrir nálgunarbannið héldu Hernandez og Ameli áfram að hittast og enduðu á því að giftast hvort öðru í Las Vegas.
Hernandez var á þessum tíma leikmaður spænska liðsins Atletico Madrid og við komuna aftur til Spánar voru hjónin handtekin fyrir brot á nálgunarbanni og enginn afsláttur gefinn.
Hernandez gisti nóttina í fangaklefa og var síðar ákærður fyrir brot á nálgunarbanni. Saksóknarinn á Spáni vill að hann verði dæmdur til eins árs fangelsisvistar. Afrýjun lögmanna Hernandez bar ekki árangur þar sem hann hafði ekki sinnt samfélagsskyldunni sem fyrir hann var sett árið 2017. Hins vegar hefur lögmannateymi hans sent inn aðra áfrýjun og það á eftir að koma í ljós hvort hún skili árangri.
Hernandez var í leikmannahópi Frakklands sem tryggði sér meistaratitilinn í Þjóðadeildinni með 2-1 sigri á Spáni um síðustu helgi.
