James Milner, miðjumaður Liverpool, hefur hrósað Harvey Elliott, ungstirni liðsins fyrir frábært hugarfar eftir að leikmaðurinn meiddist illa í leik gegn Leeds í síðasta mánuði.
„Hann hefur verið svo jákvæður síðan hann meiddist. Ég var að tala um andlegan styrk áðan, um leið og þetta gerðist, hlutirnir sem hann sagði – hann talaði eins og hann væri 30 og eitthvað ára gamall og hefði gert þetta allt áður,“ sagði Milner í viðtali á heimasíðu Liverpool.
„Hann er ótrúlegur. Hann er með frábært hugarfar, hann hefur unnið alla sína vinnu og miðar vel áfram. Ég held hann sé ekki langt frá því að vera laus við hækjurnar sem er frábært.“
Elliott lagðist undir aðgerð á ökkla stuttu eftir leikinn gegn Leeds og Jurgen Klopp sagði að hann vonaðist til að hann yrði orðinn heill undir lok tímabils.
Elliott, sem hefur leikið með yngri liðum enska landsliðsins, var kominn á æfingahjól fyrr í þessum mánuði.
„Hann er að vinna hart að sér en fólk sér það ekki, bætti Milner við. „Það sér myndböndin og það sem hann er að gera í ræktinni, en hann er heima á hækjunum núna og hann er að gera ýmislegt eins og að lyfta upp fótleggjunum til að viðhalda vöðvastyrknum.
Það er svo leiðinlegt og það væri auðvelt að sleppa því, en það er einmitt vinnan sem að skilar árangri seinna meir. Hann stendur sig mjög vel og það er frábært að sjá.“