Heimir Hallgrímsson, fyrrverandi landsliðsþjálfari karlalandsliðs Íslands vildi ekki tjá sig um orðróm þess efnis að hann gæti verið að taka við Stjörnunni í efstu deild karla. Vísir greindi frá.
Heimir hefur undanfarnar vikur verið bendlaður við þjálfarastarfið hjá Stjörnunni en hann hefur verið án starfs síðan að samningur hans við Al-Arabi í Katar rann út í maí síðastliðnum.
Heimir staðfestir í samtali við blaðamann Vísis að hann hafa rætt við fjölmörg félög undanfarna mánuði, bæði innan lands og utan.
Vefmiðillinn fotbolti.net, greindi frá því fyrr í dag að sífellt líklegra sé að Heimir taki við Stjörnunni. En í samtali við miðilinn vildi Helgi Hrannarr Jónsson, formaður meistaraflokksráðs Stjörnunnar, ekki staðfesta að Stjarnan væri í viðræðum við Heimi.
Öruggar heimildir 433.is herma að Ólafur Jóhannesson, þjálfari FH hafi verið langt kominn í viðræðum við Stjörnuna en hafi á endanum kosið að framlengja samning sinn í Hafnarfirði.